Հարյուր հայ հոգեբույժներ Կենսագրական բառարան գիրք Դ

Հոգեբույժ Հարություն Մինասյանի «100 ՀԱՅ ՀՈԳԵԲՈՒՅԺՆԵՐ» շարքի Ա, Բ գրքերը (2002, 2004, 2005) ջերմորեն ընդունվեցին մասնագետների կողմից, ինչը խթան հանդիսացավ հեղինակի համար գրելու նաև այս` թվով Դ գիրքը:

«100 ՀԱՅ ՀՈԳԵԲՈՒՅԺՆԵՐ» շարքի առաջին 3 գրքերը ընդգրկում են բոլոր ժամանակներում Հայաստանի և արտերկրի 300 հայ հոգեբույժների համառոտ կենսագրականները, ինչպես նաև Հայաստանում հոգեբուժության զարգացման պատմության հակիրճ շարադրանքը, Հայաստանում և արտերկրում երբևէ գոյություն ունեցած հոգեբուժական հիվանդանոցների, դիսպանսերների, բաժանմունքների, կաբինետների, ամբիոնների, հասարակական ու բարեգործական կազմակերպությունների համառոտ նկարագրությունը, Հայաստանի հոգեբույժների ատենախոսությունների ցանկը և գիտահանրամատչելի հոդվածներ:

«100 ՀԱՅ ՀՈԳԵԲՈՒՅԺՆԵՐ» շարքի Դ գրքում հեղինակը այբբենական կարգով ներկայացրել է բոլոր ժամանակներում Հայաստանի և Սփյուռքի հայ հոգեբույժների 4-րդ հարյուրյակի համառոտ կենսագրականները: Ինչպես նախորդ գրքերում, այստեղ ևս բացի հոգեբույժներից, հոգեթերապևտներից և թմրաբույժներից, ընդգրկված են անվանի նյարդաբույժներ, նեյրոֆիզիոլոգներ և հոգեբաններ, որոնց աշխատությունները նվիրված են բարձրագույն նյարդային համակարգի գործունեության տարաբնույթ խնդիրներին: 

Բոլոր 4 գրքերը հագեցած են դիմանկարներով և եզակի լուսանկարներով:

Հոգեբույժ Հ. Մինասյանը շարունակելով աշխատել գործնական հոգեբուժության բնագավառում և զբաղվելով հայ բժշկության պատմության խնդիրներով, ինչպես նաև քաջալերվելով մասնագետների դրվատանքի խոսքերով, արդեն ձեռնամուխ է եղել սույն շարքի հինգերորդ գրքի պատրաստմանը: 

Շնորհավորում ենք բժիշկ Հ. Մինասյանին իր, թվով 7-րդ գրքի լույս ընծայման առթիվ և մաղթում, որ իրականանա նրա երազանքը` դեռևս անտիպ հաջորդ 7 գրքերի լույս ընծայումը: Դրանք են. «Անվանի կույր հայեր», «Բռնադատված հայ բժիշկներ, Գիրք Բ», «Դիցաբանական անունները հոգեբուժության մեջ», «Հայ բժիշկները` բարձրաստիճան պետական, ռազմական, քաղաքական գործիչներ», «Հայերի դերը Ադրբեջանի առողջապահության մեջ», «Հայկական բժշկական պարբերական մամուլը աշխարհում (1860-2010թթ.)», «Օսմանյան կայսրությունում բռնաճնշումների և ցեղասպանության ենթարկված հայ բժիշկներ (XIX - XX դդ.)»: 

Հարցեր, պատասխաններ, մեկնաբանություններ